Pu Lungmuana'n Press mite kawm

Mipui Tangrual Pawl MP candidate Dr. H.Lallungmuana chuan vawiin inrinni hian Aizawl Press Club-ah Press mite a kawm a. National Party ten nzuih lam an pan mek lai hian Mizo Nationalism kengkawh zawng leh insuihkhawm zawnga kal pawimawh a tih thu a sawi.

Pu Lungmuana chuan, Nerhu-a te Mahatma Gandhi ten India ram chu pangpar huana pangpar chi hrang hrang par vul chuk angin an lo tehkhin tawh a. Chutianga Mizo hnam pawh pangpar mawi tak anga kan par theihna tur chuan khawiah mah min 'kawlawm' hran lova, keimahni dikna leh chanvo kan humhalh zel theih nan kan tanrual a ngai a ni, a ti. Chumi atan chuan UN Declaration on Indegenous People pawh hman tangkai theih a nih thu a sawi bawk.

Press mite zawhna chhangin Pu Lungmuana chuan, tuna ka khingpui ber te hi UPA mi leh sa an nih avanngin thlan tlin lo ni ta pawh ni ila, an zingah chuan ka thu kher lo ang a. Chutih rual chuan India politics hi nikhat thil thu-ah pawh danglam reng a ni a, eng party pawh nise, an thil tum leh an hmathlirte a zirin ka thlawp theihloh tur an awm ka hre lo. An thil tih tum dana thlawp tlak nia kan ngaihloh chuan Parliament House-ah pawh independent in kan thu ve mai tur a ni, a ti bawk.

A hun hmasa-ah NDA thlawp anga sawi chungchangah Pu Lungmuana chuan, NDA sorkar kha party 13 rangrual an ni a, an thil tum leh an common minimun programme a zirin pawn lam atangin ka thlawp mai a ni a, an angchhunga intulut tur chuan ka inphal lo a ni, a ti.

North East MP 25 vel zet te chu duh thuhmun leh harsatna tawn in ang kan nih avangin inhlawmkhawm a, kan hmasawnn vena tur kawngah chuan party hrang pawh ni ila kan tan tlan theihna tur kawng zawn chu thil pawimawh leh tih hmasak tur zingah a tel ngei ang, a ti bawk.

Media mite zawhna chhangin Pu Lungmuana chuan, MP thlanah hian lo tling lo ta pawh ni ila, ram in kei tehlul hi min mamawh a nih chuan tlanchhiat ka tum lo. Ka duh ber chu hlawmkhata awm hova Mizo hnam dinchhuahna hi a ni. Party zawm leh zawm loh lam hi ka lungkham ber a ni lo. tiin a sawi bawk.

He Press Conference-ah hian Media mite an kal tha hle a. Tangrual lam atangin Pu Sailothanga Sailo Ex-MLA, Pu K.Vanlalauva, Ex-Minister, Pu H.Vanlalauva Ex-Minister leh party worker thanhnem takin an tawimawm bawk a ni.